|
7 жнiўня |
 |
Сёньня дзень нараджэньня Адама Мальдзіса, астравецкага хлопчыка, які вырас у шанаванага ўсімі знаўцу літаратуры і прафэсара. А зьявіўся Адам Мальдзіс на сьвет у 1932 годзе. Сваёй малой бацькаўшчыне ён прысьвяціў цэлую кнігу “Астравеччына, край дарагі“. А ўвогуле Мальдзіс напісаў цэлую паліцу кніг пра гісторыю старой беларускай літаратуры і адкрыў шмат новых імёнаў. І ня толькі імёнаў. Лічылася, напрыклад, што ў 18 стагодзьдзі ў беларускай літаратуры быў поўны правал -- нічога не стваралася. А Адам Мальдзіс, папрацаваўшы ў архівах, даказаў, што да яго папросту дрэнна шукалі і адкрыў такім чынам цэлае літаратурнае стагодзьдзе -- 18-е. І напісаў пра гэта цікавую кнігу “Hа скpыжаваньнi славянскiх тpадыцыяў“. Наогул Мальдзіс у архіўнай справе і піянэр і першаадкрывальнік. Гэта ён у адной польскай бібліятэцы гартаў сабе кніжку, ня надта каб цікавую, але ў надта ж тоўстай вокладцы, проста ненатуральна тоўстай, як падушка. Зьвярнуўся да тамтэйшых работнікаў, вокладку акуратна разрэзалі, а там... Ноты, цэлы сшытак! Адам Мальдзіс прывез тыя ноты ў Беларусь і даў іх ансамблю Кантабіле. Тыя сыгралі. Аказалася, цудоўная старажытная музыка, якую цяпер разам называюць “Полацкі сшытак“.
|
|
|
|
