|
25 жнiўня |
 |
Сёньняшні дзень у гісторыі вылучаецца тым, што 25 жніўня нараджаліся ўсялякія ўладары, каралі і цары, а таксама генсекі, якія засталіся ў памяці народаў, як правіла, нядобрымі ўчынкамі.
Да прыкладу, 25 жніўня 1530 году нарадзіўся расейскі ўладар Іван IV, які першы пачаў называць сябе царом, а ў гісторыю ўвайшоў з азначэньнем Іван Грозны або Іван Жахлівы. Колькі ж пакутаў гэты дэспат прынес свайму народу, але й суседнім народам таксама нямала папсаваў крыві. Не аднойчы Іван Жахлівы ўрываўся на тэрыторыю Вялікага Княства Літоўскага, паліў гарады, забіваў нашых продкаў. Колькасьць ахвяраў тады з трагічнай пераходзіла ў статыстычную.
Іншы прыклад -- Людвік ІІ, кароль Баварыі, які нарадзіўся ў 1845 годзе. Гэты ўладар запомніўся як мэцэнат кампазытара Рыхарда Вагнэра, а таксама сваімі вар`яцкімі архітэктурнымі праектамі, за што яго называлі Людвікам Вар`ятам. Гэты кароль спрабаваў у Баварскіх гарах збудаваць дакладную копію Вэрсаля. Урэшце лекарскі кансіліюм прызнаў Людвіка вар`ятам, пасьля чаго няшчасны кароль патапіўся ў возеры.
Наступны сёньняшні ўладар -- Эрых Хонэкер, які нарадзіўся ў 1912 годзе. Гэты кіраваў камуністычнай уладай у ГДР ажно шаснаццаць гадоў. Такі сабе нямецкі Брэжнеў. Цікава, што памёр ён у выгнаньні ў Чылі, ужо пасьля таго, як быў разбураны Бэрлінскі мур. Газэта “Ды Цайт“ назвала Хонэкера “апошнім нямецкім камуністам“.
А яшчэ сёньня дзень усялякіх авантурыстаў і прыгоднікаў.
25 жніўня 1819 году нарадзіўся славуты дэтэктыў Алан Пінкертон. У адрозьненьне ад свайго земляка Шэрлака Холмса, Пінкертон быў рэальнай гістарычнай постацяй. Сын паліцэйскага сэржанта ў Глазга, ён вывучыўся на бондара і эміграваў у ЗША. Там пасяліўся ў невялікім мястэчку каля Чыкага і адкрыў бандарную краму -- прадаваў бочкі. Аднойчы Пінкертон сутыкнуўся з фашываманэтнікамі, якіх сам выкрыў і затрымаў. Пасьля некалькіх такіх выпадкаў людзі абралі яго шэрыфам. Урэшце Пінкертон кінуў паліцэйскую службу і заснаваў прыватнае дэтэктыўнае агенцтва, якое спэцыялізавалася на расьсьледаваньні крадзяжоў на чыгунцы. З часам агенцтва стала самым знакамітым. Самы буйны посьпех дэтэктываў Пінкертона -- гэта папярэджаньне замаху на прэзыдэнта Лінкольна. Праўда, пасьля Лінкольна ўсё адно забілі. Але імя Пінкертона стала назыўным. Сёньня і ў нашых краях сьледчых часам называюць пінкертонамі.
25 жніўня 1918 году нарадзіўся Леанард Бэрнстайн або Бэрнштэйн, амэрыканскі кампазытар, дырыжор і піяніст. Многія, напэўна, памятаюць музыку да кінафільма “Вэстсайдзкая гісторыя“. Дык гэта Бэрнстайнава музыка. А яшчэ ў сьвеце ведаюць “Імшу“ Бэрнстайна, якую ён прысьвяціў памяці прэзыдэнта Кенэды.
|
|
|
|
