Першы год нашай дзейнасьці і першая частка адліку

Нам ужо споўніўся годзік! Хочам распавесьці вам як ён прайшоў, што было зроблена, колькі што каштавала й за чые грошы, чаго мы дасягнулі. Зробім гэта за некалькі разоў, бо дзейнасьці было даволі шмат. У гэтым адліку прадстаўленыя рэзультаты дзейнасьці віленскага беларускага музэю імя Івана Луцкевіча, арганізацыі, якая арэндуе памяшканьне на Vilniaus 20 у віленскага самакіраваньня, і субарэндуе часткі яго іншым арганізацыям.

Дык вось, што мы зрабілі за гэты год?

  1. Па-першае, мы працавалі як музэй: рэстаўравалі нашыя экспанаты, паляпшалі ўмовы іх захоўваньня з дапамогай спэцыяльных архіўных тэчак, дыгіталізавалі і выкладвалі іх у інтэрнэт для агульнага доступу.
  2. Мы зрабілі некалькі выставаў. Адкрыліся мы з выставай “Чаму воля гэта жанчына” пра пратэстны рух у Беларусі 2020 года і патрыярхат. Потым была выстава прысьвечаная заснавальніку музэя Івану Луцкевічу, выстава, прысьвечаная наведнікам і згадкам у прэсе беларускага музэю, які дзейнічаў у міжваенныя гады ў Вільні, выстава фотажурналістыкі рэпартэраў “Нашай Нівы”, выставы жывапісу беларускіх мастакоў Валянціны Шобы, Алега Аблажэя, і фотавыстава ўкраінскіх твораў “Вайсковы абярэг”.
  3. Мы зладзілі новую ініцыятыву для беларускіх дзяцей у Вільні: суботнюю школку, куды ў дзьве групы ходзяць дзеці 4-7 і 8-11 гадоў. Школка хутка абрасла новымі цікавымі гурткамі: гуртком “Выдавецтва” для падлеткаў, удзельнікі якога вывучаюць макетаваньне й графічны дызайн, зрабілі часопіс пра наш музэй, а цяпер працуюць над календаром на наступны год; тэатральнай студыяй з заняткамі па вакалу, харэаграфіі і, канешне, тэатральнаму майстэрству; для бацькоў запрацавала бацькоўская школка, дзе с псыхолягам і мэдыкамі можна абмяркаваць актуальныя пытаньні дзіцячага здароўя і выхаваньня. У школцы за мінулы навучальны год прыняло ўдзел больш за 60 сем’яў, чаму мы вельмі радыя! На лета школка знаходзіцца на вакацыях, а з верасьня вяртаецца з новай сілай, новай праграмай і новымі ды старымі гурткамі.
  4. Запрацавала бібліятэка беларускай мастацкай, гістарычнай, краязнаўчай і дзіцячай літаратуры. Кніжкі выдаюцца да дому на месяц, калі яшчэ не скарысталіся гэтай магчымасьцю, вельмі раім! Дарэчы, штонядзелі мы пачалі ладзіць сустрэчу сяброў бібліятэкі ды беларускай літаратуры агулам: падчас гэтых імпрэзаў мы запрашаем размаўляць пра ўлюбёныя кніжкі, раіць чытанку сябрам і абмяркоўваць усё кніжнае.
  5. Ладзіліся імпрэзы: кніжныя прэзэнтацыі Вольгі Гапеевай, Аляксея Дзікавіцкага, Уладзіслава Гарбацкага, бібліятэкі радыя Свабода, Уладзіміра Някляева, вечар памяці Алеся Разанава; спэктакль студэнтаў ЕГУ “Міты пра людзей”; канцэрты Андрэя Хадановіча й Зьмітра Бартосіка з усёй сямейкай, літоўскага фальклёрнага гурта “Вэрэя”, а таксама выступ Зьмітра Вайцюшкевіча. Восеньню мы ладзілі традыцыйнае беларускае сьвята Багач,узімку калядавалі, адзначалі стары новы год і дзень сьвятога Валянтына сваімі ўлюбёнымі вершамі пра каханьне. Былі таксама розныя лекцыі: канфэрэнцыя, прысьвечаная беларускай музэялёгіі, лекцыя пра ўкраінскую фэміністычную лінгвістыку, курс лекцыяў псыхоляга ў праграме выставы “Чаму воля гэта жанчына”, мастацтвазнаўчая лекцыя пра сьвятых неразьдзельнай царквы, прэзэнтацыя нашых электронных выданьняў твораў Францыска Скарыны, фэміністычная сустрэча з Юліяй Міцкевіч “8 сакавіка гэта не пра кветкі”. Нядаўна мы пачалі штонядзелі сустракацца пісаць лісты палітвязьням, куды вас вельмі запрашаем: кожная нядзеля, 14:00.
  6. Не абыйшлося й без майстар-клясаў: разам з дарослымі й дзеткамі мы вучыліся калядаваць, рабілі саломенных павукоў, расьпісвалі яйкі да каталіцкага й праваслаўнага Вялікадня.
  7. У музэю два разы на тыдзень адбываецца цуд. І не проста цуд, а беларускі. Гэта гурток традыцыйных беларускіх сьпеваў “Беларускі цуд” сьпявае свае прыгожыя песьні.
  8. Яшчэ зімой мы ладзілі калядны кірмаш беларускіх рамесьнікаў! Вельмі спадабалася, будзем паўтараць, так што запрашаем ужо пачынаць па трошку рукамесьліць!
  9. А летам мы хадзілі на экскурсыі па віленскіх мясьцінах, і выдалі кніжачку самаэкскурсыі па фальклёрнай Вільні - яе можна бескаштоўна здабыць у нас, або ў віртуальным выглядзе ў нашым інстаграме пад сэкцыяй “Гіды” https://www.instagram.com/belarusiancentre_lt/.
  10. Мы зрабілі рамонт нашага памяшканьня - гэта была вялізная, шалёна стрэсовая, але вельмі прыгожая ў выніку праца некалькіх месяцаў. Колькі ён каштаваў? Адгадайце! А мы распавядзем пра ўсе лічбы ў наступнай частцы адліку.