У Віленскім беларускім музэі імя Івана Луцкевіча на гэтыя выходныя адбываецца некалькі імпрэзаў, якімі музэйшчыцы спадзяюцца выцягнуць віленчукоў з дому.

У пятніцу, 26 красавіка а 18:00 адкрываецца выстава “Зона адчужэньня”, прысьвечаная ўгодкам Чарнобыльскай трагедыі. На выставе можна будзе ўбачыць працы беларускіх дзяцей, пацярпелых ад катастрофы, зробленыя ў 1990 годзе ды рэпартажныя здымкі легендарнага фаторгафа Ўладзіміра Сапагова з Чарнобыльскіх шляхоў 90-х.

“Размова пра Чарнобыль цяпер – гэта ня толькі практыкаваньні памяці, але таксама моцная мэтафара таго, што адбываецца з намі цяпер – нестрыманай сілы, якая раськідвае нас як ёй заўгодна, на якую мы ніяк ня можам паўплываць. Але выстава сьведчыць аб тым, як беларусы выжываюць праз жудасныя рэчы, пакідаючы сьлед нашчадкам – дзіцячыя працы, здымкі дэманстрацыяў – і гэты сьлед кліча жыць наперакор усяму”, - кажа куратарка выставы Паўліна Вітушчанка.

А ў суботу а 17:00 музэй ладзіць Гуканьне вясны 2.0. “Мы ўжо ладзілі гуканьне вясны ў гэтым годзе, але рэзультат ня вельмі ўражвае”, - скардзяцца чальцы каманды музэю. – “Таму вырашылі паспрабаваць пагукаць яшчэ раз, каб ужо дакладна прыйшла бы”. Гуканьне адбудзецца ў форме канцэрту, на якім выступяць тры беларускія калектывы – фальклёрныя ансамблі “Беларускі цуд” і “Сьвітанак”, а таксама дзіцячы хор Valoški. Застаецца чакаць, што паўторнае гуканьне будзе пасьпяховым.

У нядзелю чакае яшчэ адна падзея – Вясновыя танцы. Ужо не ўпершыню ў памяшканьні музэю Клюб эўрапейскіх сацыяльных танцаў Valoška (ня блытаць з падобнай назвы дзіцячым хорам) арганізуе танцавальныя вечарыны – на гэтай наведнікі навучацца танчыць полькі і вальсы, а таксама будуць займальныя танцы-гульні. Арганізатары раяць узяць з сабой зручны зьменны абутак, каб танчыць было бы прыямней. Танцы пачынаюцца а 16:00.

Віленскі беларускі музэй знаходзіцца па адрэсе Vilniaus 20, у двары – толькі зазірнуўшы вы ўбачыце знаёмыя сьцягі, якія ўпрыгожваюць будынак музэю.

Уваход на ўсе мерапрыемствы бясплатны.

• імпрэзы