Бібліятэка Віленскага Беларускага Музэю імя І. Луцкевіча змяшчае больш за 3000 асобнікаў па-беларуску і пра Беларусь. У нас можна знайсці кнігу на любы густ: паэзыю ды прозу; сучасную ды старадаўнюю літаратуру; кнігі для дзяцей і для дарослых; навуковыя, замежныя, культурніцкія; дапаможнікі ды часопісы. Каля тысячы з іх ўжо занесена ў [электронны каталёг] (https://vbmbiblio.librarika.com/). Каб узяць сваю, напішыце нам на knihateka@vilnia.com ды забірайце кнігу ў Цэнтры беларускай супольнасці й культуры ў Вільні на Vilniaus g. 20.

Мэтай бібліятэкі зьяўляецца падтрымка навуковай, адукацыйнай і іншых сфераў дзейнасьці беларускай супольнасьці ў Літве.

Асноўнымі задачамі зьяўляюцца:

камплектаваньне бібліятэчных фондаў і забеспячэньне іх захаванасьці; ажыцьцяўленьне апрацоўкі кніг і выданьняў, стварэньне даведачна-бібліяграфічнага апарата; забеспячэньне бібліятэчнага, інфармацыйнага і даведачна-бібліяграфічнага абслугоўваньня карыстальнікаў бібліятэк згодна з іх патрэбамі і інтарэсамі; правядзеньне культурна-асветнай работы, накіраванай на судзейнічаньне культурнаму развіцьцю карыстальнікаў бібліятэкі.

Асноўнымі прынцыпамі дзейнасьці бібліятэкі зьяўляюцца:

вызначэньне агульначалавечых каштоўнасьцяў у якасьці прыярытэтных; судзейнічаньне адраджэньню, захаваньню і развіцьцю беларускіх нацыянальных культурных традыцый, забеспячэньню даступнасьці культурных даброт і павышэньню іх якасці, ахове гісторыка-культурнай спадчыны; зацьвярджэньне і распаўсюджваньне гуманістычных ідэй, навуковых і прававых ведаў і дасягненьняў сусьветнай культуры; агульнадаступнасьць інфармацыі аб складзе і зьмесьце бібліятэчных фондаў.

Бібліятэка ўзнаўляе даўнюю і слаўную гісторыю беларусаў-кнігалюбаў Віленшчыны, прыцягваючы сучасных аматараў беларускага слова, студэнтаў і дасьледчыкаў. Сёньня гэта бадай што найбагацейшы з даступных шырокаму колу чытачоў беларускі кнігазбор у Вільні, таму калі Вы сумуеце па папяровай кнізе або маеце час і ахвоту пазнаёміцца з шэдэўрамі літаратуры ды дасьледаваннямі з розных галінаў веды - шчыра запрашаем!

Сачыце за абвесткамі на сайце або ў нашых сацыяльных сетках, каб не прапусціць прэзентацыі літаратурных навінак і іншых імпрэзаў!

Хочаце стаць валанцёрам? Пішыце нам: knihateka@vilnia.com